Con motivo da celebración hoxe (25 de maio) do Día Cervantino da Literatura Infantil e Xuvenil, o Instituto Cervantes de Brasilia celebra un ano máis o programa de actividades ‘Lobos e dragóns’, que inclúe o obradoiro de animación audiovisual de OQO editora Eu tamén animo!
As suxestións de autores e ilustradores non rematan nas páxinas dun libro, os personaxes cobran vida e saltan á pantalla neste obradoiro de OQO editora, no que a partir do conto Chocolata (Marisa Núñez & Helga Bansch), os nenos e nenas de Brasilia crearán unha curtametraxe de animación coa técnica de stop-motion.
Con todos os participantes do taller, faranse varios grupos e cada un asumirá a animación dunha secuencia da obra coa imaxe e voz. Nas sesións, os pequenos e pequenas recibirán información sobre as técnicas tradicionais de animación e gravación de son.
